Bangladeshimi kiattup anorersua eqquisimaqaaq
BBC-p nalunaarutaa naapertorlugu annaassiniartut anorersuarmit eqqugaasut avinngarusimasuniittut maanna tikissimalerpaat.
Ikiuiniaqatigiinnit Røde Halvmåne-mit ajunaartut 10.000-iunissaat annilaanngatigineqarpoq. Manna tikillugu uppernarsillugu oqaatigineqarpoq ajunaartut 2.400-uusut. Suliniaqatigiiffimmit Save the Childrenimit oqaatigineqarpoq ajunaarsimasut 15.000-nik amerlassuseqariaannaasut.
Nunat tamat ikiuiniaqatigiiffii Bangladeshimut apuunniarsarileruttorput, kisianni avinngarusimanerusunut apuunniarneq ajornakusoortorujussuusoq, anorersuarmit eqqugaasunit oqaatigineqarpoq. Sumiiffinni amerlasuuni ikiortariallit umiatsiamik taamaallaat tikinneqarsinnaammata.
Bangladeshimi naalakkersuisut Dakkha-miit oqaatigaat, inuussutissat imerlu amigaataanngitsut, ajutuuissortoqanngitsorlu oqaatigalugu. Qularnanngitsumilli anorersuarmit aserorneqartut annertoqaat, qaqorteqqasunillu katersinissaq qanittukkut pisussaq ingammik eqqugaasoq oqaatigineqarpoq.