Bangladesh-imi qarsutsinersuup kingorna inuit 5 millionit qimarrapput

Bangladeshimi siallerujussuarnerata kingunerisaanik qarsutsinersuaqarmat inuit 40-it ajunaarput, inuillu 5 millionit qarsutsinersuarmit panernerusumut qimarrapput. Taama allappoq politiken.dk.

Sap. akunnera ataaseq naavillugu siallerujussuarsimanera qarsutsinersuaqarneranut pissutaavoq Bangladeshillu nunataata pingasorartserutaa qarsutsinersuaqarfiuvoq. Bangladeshimilu nunap avannaamut kangia´tungaa eqqorneqarnerpaavoq, tassanngaanniit inuit maannakkorpiaq 5 millionit qimarrapput.

Erngup illoqarfiit aqquserngi qarsutsitersimavai siffissat angullugit itissusilimmik, inuit qimarrattut sapusianut oqqiffissarsiorput ilaallu illut qaliaasa qaavinut qallorsimallutik. Maannakkullu angallatit nalinginnaanerpaat tassaapput qajarissat umiatsiaaqqallu.

Bangladeshimilu naalakkersuisut sakkutuunik tapersersorneqartut neriorsuisimapput ajunaarnersuaqarfiusunut ikiuutissallutik.