Bandidos-inut attuumassutillit eqqartuunneqartut

Angutit sisamat 26-nit 50-it tikillugit ukioqartut, ikiaroornartumik hash-imik katillugit fem kilonik annertutigisumik Kalaallit Nunaannut arlaleriarlutik anngiortumik eqqussisimasut Nuup eqqartuussiviani pineqaatissinneqarput, Sermitsiaq nittartakkamini allappoq.
Allattoq Jaaku Lyberth
maajip 21-at 2008 16:05

Angutit eqqartuunneqartut ilaat marluk Danmarkimi rockerinut Bandidos-inut attuumassuteqarput, aappaa Bandidos-init anisitaaqqammerpoq aappaalu ukiuni arlalinni Kalaallit Nunaanni najugaqarpoq, siornatigullu Bandidos-ikkunnut ilaasortanngornissaminut piukkunarsarsimalluni.

Angutip aappaa Danmarkimi rockerinit qimaalluni Kalaallit Nunaannut toqqorteriartorsimanissaa ilimagaarput, politiit ikiaroornartulerisuisa aqutsisuat Finn Jeppesen Sermitsiamut oqarpoq.

Angutit sisamat eqqartuunneqartut, ikiaroornartoq hash katillugu 5 kilo anngiortumik Kalallit Nunaannut eqquppaat.

Angutit pingasut ukiuni marlunni pinerluuteqarsimasut inissiisarfianiittussanngorlugit Nuup eqqartuussiviani pineqaatissinneqarput, sisamaat ukioq ataaseq pinerluuteqarsimasut inissiisarfianiittussanngorlugu pineqaatissinneqarluni. Aningaasat katillugit 370.750 koruunit arsaarinnissutigineqarput, pineqaatissinneqartullu eqqartuussisulersuunneqarnertik nammineerlutik akilissagaat Sermitsiaq nittartakkamini allappoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq