Bananit nunatsinneersut tunineqanngitsoorput
Nunatsinni banaaninik naatitsisartutuaasoq Bent B. Olesen, bananpalmemik ataatsimik piginnittuusoq taama ilisimatitsivoq.
Tunineqanngitsoornerannut pissutaavoq banaanit ineriaarpallaarnerat, taamalu banaanimik ataatsimik 600 koruunilerlugu piserusuttup piffissap pisiffissaata nalaani banaanit qernertuinnanngoreersimanerat.
Banaanit Narsami naatitsivimmi seqerngup kissassusaanit kiassarneqartumi naatinneqarput, tomatit, agurkit grønne peberillu naatinneqarfigisartagaanni.
Tamatumunnga ilanngullugu naqqiissutigissavarput banaanit naatinneqartut nunarsuarmi avannarpasinnerpaanerarlugit tallimanngormat taagaluaratsigik. Tusarnaartartutta ilaata eqeersimaartup naqqippaatigut oqarluni Islandimi illoqarfiit pingaarnersaat Reykjavik, - aamma banaaninik naatitsiffigineqartartoq – Narsaminngaanniit avannarpasinnerusumiimmat.