Baltimoremut aqqut matuvoq

Sooq unitsittariaqalernerlugu pisortaanerup Michael Binzerip ima nassuiarpaa:

- Suliffeqarfissuarmut 2007-imi angusarineqartut kusanartuupput, paasivarpulli Baltimoremut timmisartuussisarnerput ilimagisatsinninngarnit pitsaannginnerusoq, 15,1 mio. koruuninillu amigartooruteqarneq soorunami akuersaarneqarsinnaanngilaq.

Ilimagisamit pitsaanerusumik pisoqarsimannginnera aalajangernermut tunngavigineqarpoq.

- Oqartariaqarpugut USA-mi piserusussuseq tamatta ilimagisatsitut annertutigimanngitsoq, peqatigisaanillu Kalaallit Nunaanni piserusussuseq taamatulli annertutiginngitsoq.

- Baltimoremut timmisartuussisarnitsinni atukkavut Københavnip Kangerlussuullu akornanni aalajangersimasumik timmisartuussisarnitsinni unammillernitsinnut atulissavagut. Aamma SAS-imik unammillernitsinni paasisitsiniuteqarnissamik suliniuteqarnissarput ilimanarpoq.

Air Greenlandimi aasarnissaanut inniminniikkat uppernarsarneqartut 170-iupput.

- Naatsorsuutigaarput inuit billettiminnik akiliisimasut allatut angalanissaat akisussaaffigilissallugu, taakkunannga 2/3-ii USA-minngaanneersuupput 1/3-iilu inulaarlugit Kalaallit Nunaanninngaanneersuullutik. Taakkua neqerooruteqarfigissavavut, inuillu namminneq neqerooruteqarneq allatulluunniit angalanissaq akuerissanerlugu imaluunniit aningaasat akiliutigisimasatik utertissanerlugit toqqassavaat, Michael Binzer oqarpoq.

Air Greenlandip 2007-imut angusai akileraarut peernagu 73,2 miliuunit koruuniupput, ukiullu ataatsip matuma siornagut naatsorsuutigisanit pitsaanerullutik.

Taamanimi angusat 50 miliuunit koruunit sinningaarnavianngikkaat naatsorsuutigineqaraluarmat. Ukiut tulliuttut sisamat ingerlanerini timmisartuutileqatigiiffiup angusani 50 procentimik qaffannissaat anguniarniarpaa, tassa sulisumi immikkut ilinniarteqqinnerisigut timmisartuutillu taarsernerisigut nutarterinikkullu, pisortaaneq Michael Binzer taama ilisimatitsivoq.