Baltimoremut aqqut matugaluartoq amerikamiut suli Kalaallit Nunaannukarsinnaapput
Kalaallit Nunatsinni Takornariaqarnermi Inuussutissarsiornermilu Siunnersuisoqatigiinni, GTE-mi, pisortaq, Thomas Rosenkrands, nuannaajallannartumik taama ilisimatitsivoq.
-Icelandairip timmisartuutai Amerika Avannarlermeersut tamangajammik, ikittunnguit kisimik pinnatik, takornarniat angallatileruttorneranni ullaakkut nalunaaqutaq arfineq-marlup qeqqa sioqqullugu tikittarput.
Air Icelandip timmisartuutaa, Dash 8, maajip ulluisa 29-ata septembarillu ulluisa tallimaata akornanni tasamani timmisartoqarfimmiit ataasinngornikkut, sisamanngornikkut tallimanngornikkullu nalunaaqutaq ulloqeqqata siorna qulinut tanneq qulingiluat aallartassaaq, Thomas Rosendkrans tunngavilersuivoq.
-Kulusummukarniaraannilu Islandimi illoqarfiit pingaarnersaanni unnuisoqarsinnaavoq. Air Icelandillu timmisartuutaa Reykjavikimiit Kulusummut ullut tamaasa ulloqeqqata siorna qulit qaangerlugit tanneq marluk aallartarpoq, taamaallaat sapaatikkuunngitsoq.
Reykjavikimiillu sapaatip akunneranut marloriarluni aamma Narsarsuarmukartoqartasaaq, tassa juunip ulluisa 30-anniit septembarip ulluisa 19-iata tungaanut, GTE-mi pisortaq oqarpoq.
