Balimi ataatsimeersuarneq naammassivoq
Tamanna Naalagaaffiit Peqatigiit silap pissusaa pillugu Balimi Indonesiamiittumi ataatsimeersuarneranni pivoq, tassani ilungersunartumik misigissutsillu atorlugit oqalugiarujussuarnerit, ersaartaannerit USA-mullu naammagittaalliuutinik nillianerit paarlakaatiinnavillugit ingerlanneqarput.
Ataatsimeersuarnerup naajartulernerani Naalagaaffiit Peqatigiit silap pissusaanut pisortaatitaata Yvo de Boerip qasoqqaqisup ataatsimiiffik qimaannartariaqalerpaa. Tamanna sioqqullugu qiasunngoqaluni ministerit ataatsimeersuaqataasullu nunanit 180-init amerlanerusuneersut nassuiaappai, Kinap Indiallu siunnersuummut aalajangersimasumut kamannerujussuat nammineq kukkunermigut pisuussutigigini. Siunnersuut aaqqiagiinngissutaaqisoq oqallisigineqalermat Kinap isumaqatigiinniartitaa allamik pisassaqarluni najuutinngilaq, taama pisoqarnera Kinap utoqqatseqqusineranik ataatsimiinnerullu unitsinneqartariaqarneranik piumasaqarneranik kinguneqarpoq.
Piffissap taamaalinerani ataatsimeersuaqataasut 10.000-init amerlanerusut ataatsimeersuarnerup naammassinissaa 20 tiiminik qaangerlugu ataatsimeersuarnertik ingerlatereersimavaat.
Suleriaqqinnissamut piffissaliunneqartoq USA-p tatisineratigut sakkukillisinneqarpoq. Gassimik silaannarmik kissakkiartortitsisartumik CO2-mik aniatitsinerup millisarneqarnissaanik Naalagaaffiit Peqatigiit silap pissusaanik immikkut ilisimasalittaanit anguniaqquneqartut pingasuusut pinngitsoortinneqarput. Naak CO2-mik aniatitsinerup millisarneqarnissaanik piffissalersuinissaq qatangiinnaraluartoq, danskit silap pissusaanut ministeriata Connie Hedegaardip Konservativineersup ataatsimeersuarnermi piffissaliussatut aalajangersakkat naammagisimaarpai.
- Københavnimi silap pissusaa pillugu ataatsimeersuartitsinissamut aporfippassuit suli aqqusaagassaraavut, taamaattorli piffissalersuisoqarnissaanik piumasarput anguarput. Connie Hedegaard naggasiivoq.
