Bahrainimiit nutaarsiassaq qiimmaallannartoq
Taakku parnaarussaapput kunngip, sunnimusliimiusup, Hamad al-Khalifap, uppitinneqarnissaa kissaatigisimagamikku.
- Ajunngitsup tungaanut tamanna alloriarneruvoq pitsaasoq, illuatungiliuttut partiivisa ilaannit, Wefag-imit, Ibrahim Matter oqarpoq.
Taassuma naliliinera malillugu parnaarussat 100-it missaanniittut maanna iperagaareerput, sulili ikigisassaanngitsut parnaarussaaqqallutik.
Sunnimusliimit, ikinnerussuteqarlutik naalakkersuisuusut, kunngiminnillu siuttuuffigineqartut, shiamusliminit sapaatip akunnerini pingasuni akerliussutsimik maannamut takutitsiffigineqartarput. Taakku piumasaraat nunaminni demokratiip atuutileqqinnissaa, aamma innuttaasut tamarmik assigiimmik pineqartalernissaat piumasaralugu.
Politikkikkut allannguisoqarnissaa piumasaralugu inuppassuit, titusindit tungaanoortut, Manama-mi illoqannginnersami katersuupput.
Politikkikkut allannguisoqarnissa pillugu isumaqatigiinniartoqassasoq, kunngip illuatungiliuttut neqeroorfigereeraluarpai. Politikkikkut eqqarsartaaseqarneq pillugu parnaarunneqarsimasut iperagaatinnagit, tamassumunngalu akisussaasut pillarneqartinnagit, illuatungiliuttut isumaqatigiinniarnissaq itigartissimavaat.
Isumaqatigiinniartoqassanersoq maannamut suli nalunarallarpoq.