Bagdadimi peqqarniisaarneq ingasalluinnarpoq
Irakimi illoqarfiit pingaarnersaani, Bagdadimi, peqqarniisaarneq sapaatip-akunnerani kingullermi ingasalluinnarpoq. Ingasaassiniat upperisarsioqatigiit allat Shiit-it illoqarfiat, Sadr City, upperisarsioqatigiit Sunnit saassuppaat, inuillu 200-t sinneqartut toqorarlugit.
Tamatumali kinguneraa Shiit-it sakkutuuisa, Madip sakkutuuinik taaneqartartut, nuannarineqarnerulernerat.
Illoqarfiup kujasinnerusortaani sisamanngormat pissutsit ajorluinnarput.
Biilit tulleriiaaginnavillugit qaartinneqaqattaarput, taakkualu aserueqaat, toqorartoqaqaarlu.
Qaartartullu allat arfinillit qaartinneqarmata ajunaartut amerlanerulerput, 215-it toqunneqarput amerlanerusullu ikilerneqarlutik, paatsiveerunnersuaqalerporlu.
Paatsiveeruttoqalernerata nalaani inuusuttut Madip sakkutuuinik taaneqartartut ikiuillutik aallartipput, taamalu ikiligaasut napparsimmaviliaassorneqarlutik, toqusullu toqusut inaannukaassorneqarlutik.
Politiit takkukkaluarput, taamaattorli Madip sakkutuui ikiuilluarsimaqisut isigisunit oqaatigineqarpoq.
Madip sakkutuui inuinnarnik illersuisutut ulluni tulliuttuni inissisimapput.
Illumiit illumut qimagaasimasunik ikiuiniarlutik, nerisassanillu agguaallutik, angalaqattaarput.
Iliuusaat Libanonimi Hizbollah-kut periaasiinut eqqaanarput. Taakkua avataaniit isiginerlugaasorujussuupput, inuiaqatiminnilli ataqqisaasorujussuullutik.
USA-mit piumasarineqartarpoq Irakimi sakkutuutut pissusilersortut, soorlu Madip sakkutuui, atorunnaarsinneqartariaqartut, politiinillu taarserneqarlutik.
Inuit ilaasa Madip sakkutuui iluarisorujussuuaat sunni-musliminut peqqarniisaarnianut illersortigigamikkik.
Naak Madip sakkutuui aammattaaq sunni-musliminut akiniaaniarlutik peqqarniisaarniartarsimagaluartut inerteqqutaalernissaat ilimananngikkallarpoq. Tassami innuttaasunit taama nuannarineqartigisut inerteqqutaatissallugit ajornakusuussaaq.
