Unnerluussummi allassimavoq, ileqqorlunneq, tillinniarneq, naalagaaffiup suliffeqarfiiniit aningaasanik atornerluineq allarpassuillu, ukiut 25-t taakku ingerlaneranni pinerluutigisimagai. Nutaarsiassaqartitsivimmi Ritzauimi tamanna allaaserineqarpoq.
- Inuunermini atugai misissuinermi eqqartuussisup maanna akisussaaffigilerpai, illoqarfiit pingaarnersaanni, Port-au-Prince-mi, unnerluussisuuneq, Aristidas Auguste, oqarpoq.
Unnerluussutit tunuliaqutaralugit eqqartuussisoqassanersoq eqqartuussisumit ullut 30-t qaangiutsinnagit aalajangerneqartussanngorpoq.
Baby Doc unnerluussisumit nalunaaquttap akunnerini arfinilinni killisiorneqareerluni iperagaavoq.
Ileqqorluttutut, politikkikkut akerliusunut toqutsisartutut, naalagaaffiullu aningaasaataanik atornerluisutut pasineqarluni kisermaassilluni naalakkersuisuusimasoq taanna nunanit tamanit assuarlerneqarpoq, inuppassuillu pikitsitsereersullu nunaminit 1986-imi qimaatitaavoq.
Kisermaassilluni naalakkersuisuusimasoq Haitimut uternermigut politikkimut uterniarnersoq inuppassuarnit eqqarsaatersuutigineqalerpoq.