Per B: Sumiginnaaneq akiorniarnerusariaqalerpoq

Partiinut naalakkersuisooqatigiinnut illuatungiliuttut Demokraatit siulittaasuat Per Berthelsen ukiut nikinneranni aamma oqaaseqarpoq.

Inuiaqatigiinni pisussaaffippassuit tamaasa kaluarnagit Demokraatit siulittaasuata Per Berthelsenip ukiortaamut oqaseqarnermini meerartatsinnik inuusuttatsinnillu sumiginnaajuarnerup iliuuseqarfigineqartariaqalernera pingaartillugu tikkuarpaa.

- Juullikkuni ataatsimooqatigiinnerput nuannaarutissarpassuaqarpoq. Meerarpassuit nissiaqqatut nasartuussimasut aqqusinerni pinnguartut, isaarissanilu æbleskivisunni gløggesunnilu.

Assiliaaqqalli qillaalasut erniinnaq alittorneqartussaapput, aput aappat tamani sarsakataalissallutik. Meeqqat nissiaqqatut nasatik peerunikkik unnuarsuaq tikillugu pinnguartussaapput, angajoqqaaminnut aalakoortunut angerlarumannginnamik. Æbleskivesunni gløggesunnilu qaangiuppata ajuusaarnaraluartumik immiaararsunni qorsunnilu naamasassanngortarput.

Tamanna pitsaanerulaalersissinnaanerparput? Per Berthelsen oqaaseqaammini taama aperaaq.

Partiit naalakkersuisooqatigiit sumiginnaanermut annertunerusumik maannamut suliniuteqarsimannginnerarlugit Per Berthelsenip isornartorsiorpai.

-Kalaallit Nunaat pitsaanerusumik ingerlalissappat matuersaataa inooqatigiinnermi ajornartorsiutiniippoq. Taamaattumik Demokraatit neriupput ukioq 2007 tassaajumaartoq meeqqanik sumiginnaaneq akiorniarlugu iliuusissat pillugit oqilliffik, Per Berhelsen allappoq.