Per B: Qinersisoqartussaagaluartoq isumaqatigiinniarnerit nangissapput

Qinersisoqanngikkallarmalli isumaqatigiinniarnissamut pisinnaatitsissutit suli atuupput, taamammat juunip aappaanni qinersisoqartussaagaluartoq, isumaqartigiinniarnerit ingerlaannarnissaat akornutissaqanngitsoq, Isumaqatigiinniarnermut immikkortoqarfimmiit oqaatigineqarpoq.

Aningaasaqarnemut naalakkersuisuugallartoq, Per Berthelsen, ilisimatitsivoq, qinersisoqarnissaa suaarutigineqaraangat, taamaallaat piumasaqaatigineqalersartoq Naalakkersuisut nutaamik aallartitsinnginnissaat, allanilluunniit piareersimaffigineqariinngitsunik Namminersornerullutik Oqartussanut pituttuisoqannginnissaa. Naliginnaavorli suliat ingerlareersut sunnerneqaratik ingerlaqqittarnerat.

- Peqqinnissaqarfimmi atorfilinnut isumaqatigiinniarnerit pilersaarutaasutut ingerlapput. Tupigusuutigaaralu Olga P. Berthelsen oqarmat, isumaqatigiinninarnerit soorlulisooq unittoorsimasut. Isumaqatigiinniarnerit isasoornerannik, Isumaqatigiinniartut arlaannaalluunniit nalunaaruteqarnikuunngilaq. Taamaatumik isumaqatigiinniarnerit piginnaatitaassut naapertorlugu ingerlapput, aningaasaqarnermut naalakkersuuugallartoq Per Berthelsen oqarpoq.

Peqqissaasut Kattuffianni siulersuisuni ilaasortaq Naja Kriegel pingasunngornermi maajip arfernani Radioaviisimut oqarpoq, qinersisoqartussanngornera peqqutigalugu isumaqatigiinniarnerit uninngasut. Kisianni qinersineq aporfiunngitsoq, Per Berthelsen oqarpoq.

- Qineqqusaartut akornanni oqallinnermi tunngaviuvoq, peqqinnissaqarfiup atorfilittat eqqarsaatigalugit ajornartorsiuteqarnerujussua. Taava qanoq ililluni illersorneqarsinnaava, qinersinissaq utaqqineqassasoq taassumalu kingorna piginnaatitsissummik aatsaat sanasoqareerpat isumaqatigiinniartoqaqqissasoq? Per Berthelsen aperaaq.