B-67 sulorarnermi angusarissaarpoq
Angutit arnallu ataasiakkaarneranni siorna pissartat ukiormanna pissartanngoqqipput GM Sisimiuni ingerlanneqarmat. Frederik Elsner B-67-meersut klubbeqatminut Jens Frederik Nielsenimut finalemi ajugaavoq. Arnani Sara Lindskov Jacobsen B-67-meersut klubbeqatiminut Rina Møller Lorentzenimut ajugaavoq.
Grønlandsmestrene i herre- og damesingle genvandt deres titler ved GM i Sisimiut. GM sioqqullugu pissanngatigineqarpoq inuusuttut Jens Frederik Nielsen aamma Taatsi Pedersen Frederik Elsnerimut unammillersinnaalersimassanersut.
Angutillumi ataasiakkaarlutik finalerneranni Jens Frederik Nielsen aallartilluaraluarpoq sætimi siullermi 22-20-mik ajugaangami. Frederik Elsnerili sætini tullerni marlunni 21-18-mik aamma 21-15-mik ajugaalluni pissartanngorpoq.
Jens Frederik Nielsenili aamma kultinnappoq arnat angutillu akuleriillutik unammineranni Rina Møller Lorentzen iligalugu pissartanngoramik ajugaaffigalugit Taatsi Pedersen aamma Juliane Brønlund sætini 21-17, 15-21 aamma 21-18-mik.
Frederik Elsner aappassaa pissartanngorpoq angutit iligiiaarneranni Mininnguaq Kleist iligalugu. Tassani Jens Frederik Nielsen aamma Taatsi Pedersen ajugaaffigaat 21-17, 21-17-mik.
Taamaasillutik angutit misilittagartunerusut suli pissartaapput.
- Kisianni qularutiginngilara aappaagu kinguaariit nikikkumaartut. Inuusuttut pikkoreqaat taakku aappaagu pissartanngorsinnaapput, sulorarnermi ukiorpassuarni malinnaasoq Albricht Damgaard B-67-meersoq oqarpoq.
Sara Lindskov pisassaanngilaq
Arnat ataasiakkaarneranni pissartaq suli tassaavoq Sara Lindskov Jacobsen B-67-meersoq. Taanna finalemi klubbeqatiminut Rina Møller Lorentzenimut ajugaavoq 21-7 aamma 21-5-mik.
Sara Lindskov Jacobsen pissartanngoqqippoq arnat iligiiaarnernni Rina Møller Lorentzen iligalugu Juliane Brønlund aamma Tina Madsen JBF Ilulissaneersut ajugaaffigigamikkit 21-13, 21-13-mik.
Sara Lindskov Jacobsen pingajussaa pissartanngorpoq arnat angutillu akuleriillutik iligiiaarneranni tassani U-19-ni unammeqataagami. Tassani pissartanngoqatigaa Hans Brummerstedt taakku finalemi Niels Thorleifsen aamma Hedvig Broberg ABK Aasianneersut ajugaaffigaat 21-12 aamma 21-19-mik.
Taamaasilluni GM B-67-mut angusarissaarfiuvoq ujamippassuit Sisimiuniit angerlaakkamikkit.
- GM sioqqullugu Islandimut sungiusariarsimanerput assut iluaqutigaarput. Angalanerup taassuma kingorna pissarseqaagut, Albricht Damgaard oqarpoq.
