B-67 pissartanngorpoq
Illup iluani isikkamik arsarluni Kalaallit Nunaanni pissartanngorniunnerit sapaatip akunnerata naanerani Maniitsumi naammassineqarput, B-67-ilu Nuummeersoq pissartanngorpoq.
Pissartanngorniunnerit inuppassuarnit malinnaavigineqarsimasut nalunaarutigineqarpoq.
B-67-ip pissartanngornissaa qularutigineqarsinnaasimanngilaq, ilami B-67-ip holdii marluk pissartanngorniutivinnissamut anngussimammata.
G-44 Qeqertarsuaq aamma N-48 Ilulissat bronzinnanniupput, tassanilu G-44 ajugaasuulluni.
Nukannguaq Zeeb G-44-meersoq pissartanngorniunnerni isertitsinerpaajusimavoq, ilungersorluarnerpaatut arsaqatiminit toqqarneqartoq tassaavoq Jim Degn Olsvig N-48-meersoq, pissartanngorniunnernilu arsallaqqinnerpaatut toqqarneqartoq tassaalluni Børge Høy B-67-imeersoq.