B-67 pissartanngorpoq

B-67 Nuummeersoq angutit inersimasut pissartanngorniunneranni pissartanngorput finalemi Nagdlúnguak Ilulissaneersoq 3-2-mik ajugaaffigalugu (nutaanik assitaqarpoq)
Allattoq Noah Mølgaard
aggustip 11-at 2012 16:53

Norsaq Lund Mathæussen B-67 sinnerlugu pingasoriarluni isertitsivoq. Siullermeerluni isertitsivoq minutsit sisamat ingerlariiginnartut. Nukaa Kaali Lund Mathæussen Nagdlúnguak sinnerlugu isertitsigami naligiilersitsigaluarpoq. Muminnissarli sioqqullugu Norsaq Lund Mathæussen marloriarluni isertitseqqippoq.

Mumeriitsiarlutik Markus Jensen Nagdlúnguak marloraartillugu isertitsivoq. Unamminerulli sinnera B-67ip siuarsimanini attatiinnarpaa naak unammisut tamarmik amerlanerusunik isertitsinissamut periarfissaqartaraluartut.

G-44 Qeqertarsuarmeersoq bronzennappoq FC Malamuk Uummannameersoq 6-0-mik ajugaaffigalugu. Tassanilu arsartumik ataatsimik aamma pingasoraartoqarpoq Aputsiaq Olsen pingasoraarmat.

Angusat:
G-44 – FC Malamuk 6-0 bronzennanniuttut
B-67 – Nagdlúnguak 3-2 finale

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq