B-67-p minutsimi kingullermi kuulti tillikkaa
Pissartanngorniunnerit Nuummi Inussivimmi naggaserneqarmata S-68 Sisimiuneersoq B-67 Nuummersorlu pissartanngorniutivinnerat pissanganarluinnarpoq.
Akunnerup affaa sinnerlugu isertitsisoqarani unammereersut unamminerup naammassinissaanut minutsit arfinillit amigaataasut Aputsiaq Gabrielseni S-68 1-0-imik siuartillugu isertitsivoq.
B-67, unamminerup ilarujussua illersuinerulluni inissisimasoq, arsariaasertik allanngortippaat. Måliniittoq arsartumik taarserpaat. S-68-ilu unamminermi saassussisaqattaarnerusoq måimik ataatsimik siuaqqanertik illersulerpaat.
Minutsit kingulliit ingerlanerini B-67-ip periarfissarpassuit anginngitsut atornerloqattaarpaat. Unamminerulli naammassinissaanut minutsit marluujunnaartut Rene Olsen Dahl saassusseriataarnermi isertitsivoq unammisullu naligiilersillugu. Sekundillu 30-t kingorna isiginnaartut pikkutsaatigeqisaanik S-68-ip måliniittuata unitsissinnaanngisaanik Rene Olsen Dahl isertitseqqippoq B-67-ilu siuartillugu.
B-67 2-1-imik ajugaalluni pissartanngorpoq. Tamanna pissusissamisoortutut taaneqarsinnaavoq naak S-68-i ajugaasimasuuppat aamma pissusissamisoorluinnassagaluartoq. Qularnanngitsumik Nunatsinni holdit pikkorinnerpaat marluk naapipput S-68-ilu ajugaasimasinnaagaluarluni.
Qularnanngitsumik nukappissat ilaasa sinnattui piviusunngorput tassami arsartut ilaat nuannaarnerup pianik qullilisut takuneqarsinnaammat.
S-68-ikkunni pakatsineq angeqaaq, tassami guultinnannissaminnut minutsialunnguit amigaatigigamikkit.
IT-79 ajugaarujussuartoq
Nivissat pissartanngorniutivinneranni IT-79 aamma B-67 unammipput. Unammineq taanna pissanganerserpianngilaq, tassami aallaqqaataaniilli IT-79-ip arsalerluarnerunera ersarimmat.
IT-79 11-0-imik ajugaallutik pissartanngorput. Nuannaaqaat taamatulli 2-nngortut aamma nuannaarlutik.
Inerneri allat inerneri ukioq mannalu arsarluarnerpaatut toqqagaasut uani takuneqarsinnaapput.
Pissartanngorniutivinnermi unamminerit uani takukkit:
S-68 - B-67 IT-79 - B-67 IT-79 - B-67