Pissartanngorniunnerit aallartimmata siallerpoq anorlingaatsiarlunilu.
Unamminerit aallartinnissaannut siggartoqarmat sialussuarpoq anorersuartullu sakkortutigisumik anorsarilluni, siulliullutik unammisuupput nunaqarfimmiut TM-62 Tunumi Kulusummeersut, aamma Kujataani Tasiusameersut Eqaluk 54. Kulusummiullu nuannaarutissaqaqaat, tassami TM-62 marloraarluni ajugaavoq, Eqaluk 54 susaartoq.
B-67 Nuummeersut Malamullu Uummannameersut sialussuup ataani tullinnguullutik unammipput, unammineq nalunaaqutaq tallimanut aallartilluni, unamminermi tassani ajugaapput B-67, sisamaraarlutik Malamuk susaartut.
Silassaq ulluni tulliuttuni pitsaavallaanngilaq, unaminerilli sisamat aqagu ingerlanneqassapput, aamma Nuup arsaattarfiani nalunaaqutaq tallimanut ammaanersiorneqassalluni.
Arsaalluni inernerit ullaakkut Radioavisini sapinngisamik tusarliunniartassavavut.
Ukioq-mannalu kikkut pissartanngussanersut arfininngorpat paasinarsissaaq.