AWG2016-ip aallartinnissaanut qaammatit marlunngorput
![](/sites/default/files/styles/image_934x467/public/article_images/d81_0272.jpg?itok=rCy6y_lb)
Aaqqissuisut soorunami ulapputileruttorput, assersuutigalugu suliffissatut pilersaarutip suliarineqarnissaa ulapputigineqarluni. Arctic Winter Games 2016-illu pisortaanut tullersortip Arnakkuluk Jo Kleistip maanna oqaatigaa suliffissatut pilersaarut suliarineqarsimalersoq, kajumissutsiminnik suleqataasussat 1700-t missaannittut suliffissaat pilersaarusiorneqarsimalerluni.
Kajumissutsiminnilli suleqataasussanik suli amigaateqartoqartoq aaqqissuisut nalunaarutigaat.
- Asasara innuttaaqat, periarfissaq atorluaruk aaqqissuussarlu immikkuullarissoq akuuffigalugu. Atorfissaqartippatsigit, Kommuneqarfik Sermersuup borgmesteria Asii Chemnitz Narup kajumissaarivoq.
Nammineq kajumissutsimik suleqataaniaraanni ulloq nalunaarfissaq kingulleq tassaavoq januaarip ulluisa 31-at.
Februaarip ulluisa 29-anniit marsip ulluisa 16-iata tungaanut kajumissutsiminnik suleqataasussat pinerluuteqarsimannginnerannik meeqqanillu pinerliisimannginnerannik uppernarsaatinik pissarsiniarnissaq pissutaalluni ulloq nalunaarfissaq kingulleq tassaavoq januaarip 31-at.