VIDEO AWG2016 aputissaaleqivoq

Silap manngunnera iluarineqarsinnaagaluartoq aputaasannera Arctic Winter Gamesimut ulorianartorsiortitserataarsinnaavoq.
Allattoq Sivert Olsen, Tikaajaat Kristensen
januaarip 21-at 2016 14:38

Nuummi ippassaq kiannerpaagami aqqanilinnik kiappoq. Issittormiut unammiuaarnissaanni ujakkaarluni unamminermi aallarfissat ilaat aputaasalluni taseqqinngujoorpoq.

Timersuutit assigiinngitsut arfineq marluk silami unammissutaasussaammata aputaasannera aaqqissuisunut ernumalersitsisimanersoq Arnakkuluk Jo Kleistimut apeqqutigaarput.

- Soorunalimi uaguulluni aput maqaasinarpoq, neriunnaraluarpoq apissasoq, aamma suli ullut arlallit apissasoq Arctic Winter Games tungaanut aamma apiuassasoq, AWG-mi pisortap tullia Arnakkuluk Jo Kleist KNR-imut taama oqarpoq.

Sulilu apummik amigaateqassagunik assigiinngitsunik pilersaaruteqarlutik suliniuteqarlutillu Arnakkuluk Jo Kleistip oqaatigaa.

Aputaarutiivissagaluarpat silamilu sisorartoqarsinnaanani illoqarfinnut allanut nuunneqarsinnaaneri periarfissaava?

- Aputaarutiivinnissaa ilimananngilaq. Naamik illoqarfinnut allanut nuunneqarnavianngilaq. Arcitc Winter Gamesi maani Nuummi ingerlanneqartussaavoq, Arnakkuluk Jo Kleist akivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq