AWG-mi Irlandimiut kalattuannik takutitsissapput

Arctic Winter Games-imi peqataasussat 124-t Canadap North West Territorie-aaniittumut Yellowknifeliarlutik aqagu aallassapput. Peqataasussat timersortartuupput aammali kulturikkut nittarsaassisussanik peqataasoqassaaq.
Allattoq Louise M. Kleemann
marsip 07-at 2008 13:28

Inuusuttuaqqat isiginnaartitsisussat arfinillit Sila-mik taaguuteqartinneqartumik takutitsisussat peqataasunut ilaapput.

Arctic Winter Games-imi isiginnaartitsisussat ippassaq Katuami isiginnaartitsipput – taakkualu ilagaat Qeqertarsuarmeersoq 14-inik ukiulik Hans Henrik Poulsen. Taanna NAPA-mi atorfilimmit Ruth Montgomery-Andersenimit nassaarineqarpoq isiginnaartitsissummilu peqataalluni. Hans Henrik Poulsen immikkuullarissumik piginnaasaqarpoq, tassa Irlandimiut kalattuuannik taaguutilimmik - Riverdance - qitissinnaagami.

- Kalaallit Nunaanni siullersaagunarlunga ilinniarpara, Hans Henrik Poulsen oqarpoq. Taassuma oqaluttuaraa qitittariaaseq nammineq kisimiilluni ilinniarsimallugu.

- "Sila"-mi peqataalluni nuannerpoq. Isiginnaagassiami kalaallit qitittarnerannut tunngasumi, nukappiaraq qajartortartuusaarpunga, Hans Henrik Poulsen aqagu Arctic Winter Gamesimut peqataasussat ilagalugit Canadamut aallartussaq, taama oqaluttuarpoq.

Sapaatip akunnerata tullia Kalaallit Nunaanni timersornikkut pisoqarfiussaaq, tassami Arctic Winter Games-eqarnerata saniatigut arnat assammik arsartartut U20 nunarsuarmi pissartanngorniunnermi Argentinami ingerlanneqartussami peqataasussaammata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq