AWG 2016-ip pingaarnertut aningaasaliisussamut isumaqatigiissuteqaqqippoq

Mentorix ApS Arctic Winter Games 2016 Nuummi ingerlanneqalerpat pingaarnertut aningaasaliisussat ilagisussanngorpaat. Mentorix ApS suliniutinik aqutsinermik suliaqartuuvoq nunarsuarlu tamakkerlugu digitalimik pilersaarusiornermik suliaqarnini tusaamaneqaatigalugu.
Allattoq Peter Troelsen, Simon Uldum
januaarip 20-at 2014 08:22

Pingaarnertut aningaasaliisussanngortoq Nuummi aalajangersimasumik siorna allaffeqalerpoq, taamaasillunilu Nunatsinni attaveqalereersimalluni. Nunatsinnilu timersornikkut aaqqissuussinerit annersaannut aningaasaliissuteqarnikkut attaveqarnera nukittorsarneqassaaq.

- AWG 2016 pisussaq asseqanngilluinnartoq, ineriartornissamut nutaamillu ataatsimoorfeqarnissamut ilasaataassaaq. Taamaattumik tunniussaqarsinnaanerput uagutsinnut nuannerluinnarpoq,  tassani unammersuartitsinissaq qitiutillugu piginnaasatigut qaffassaaqataasinnaaneq pingaarnerutipparput, Mentoriximi Seniorpartneri Kenny Munck taama oqarpoq.

Aningaasaliinissamik isumaqatigiissut AWG-p 2016-imi naammassinissaata tungaanut atuutissaaq, illuatungeriillu suleqatigiinnertik aallartilluareerpaat. Ilaatigut peqatigiillutik pilersaarusiorneq pillugu isumasioqatigiissitsisimapput.

- Mentoriximik isumaqatigiissuteqarneq uagutsinnut pingaaruteqarluinnarpoq. Inuiaqatigiit piginnaasatigut qaffassarneqarnissaat AWG 2016-imi qitiutinneqarnissaa pineqarpoq. Suliniutinik aqutsinermut piginnaasatigullu qaffassaanermut tunngasutigut taakku piginnaasaat ilisimasaallu iluaqutigalugit, nunat assigiinngitsut akornanni misilittakkat misilittagaqarfigilernissaannut assissaqanngilluinnartumik periarfissaqalissaagut, AWG 2016-imut general manageri Maliina Abelsen taama oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq