VIDEO AWG 2016-imi takutitsisussanik ujarlerput

Nunat Avannarliit - NAPA - inuusuttunik aappaagu ukiuunerani Arctic Winter Gameseqartoqarnissaani kulturikkut takutitserusussinnaasunik ujartuivoq.

Kulturikkut takututsisussat 2016-imi marsip arfernaniit aqqarngata tungaanut, Arctic Winter Gamesimi peqataasut peqatigalugit Nuummiissapput.

- Kalaallisut tuluttullu oqaaseqartarluni - nipilersorneq, qitinneq, erinarsorneq atorlugit - isiginnaagassiaq alutornassamaaqaaq, NAPA-mi ataqatigiissaatisoq Najâraq Egede oqarpoq.

Inuusuttut unammiuaartoqannginnerani takutitsinnermik sungiusassapput, taamaammallu februarip 22-ani 2016-imi katersuutinneqareersimassapput.

Ilitsersuisartoq Kristian Mølgaard inuusuttut piginnaaneqarluartut qinnuteqaqqullugit kaammattorpai:

- Takutitassioqatigiinneq ilungersunarsinnaavoq, kisianni pisussat nalliuppata misigisassat inuunerup sinnerani eqqaamasassaassasut qularnanngilaq! Inuusuttut pisinnaassuseqarluartusi qinnuteqakutsoorniaritsi, ilitsersuisoq Kristian Mølgaard taama kajumissaarivoq.

Qinnuteqarfissaq ulloq kingulleq tassaavoq oktobarip 15-iat, uunnga:

Najâraq Egede - NAPA/Nordens Institut i Grønland, 32 47 33-mut sianerlutit imaluunniit e-mailimut najaaraq@napa.gl-mut allallutit.

Arctic Winter Games 2016-ip pisortatigoortumik nipilersuutaa uani aasinnaavat.