Aviâja Helms tunuarpoq
Eqqarsarluareernerup kingorna pisortanngornissamik neqeroorfigineqarnini akueriniarnagu ukioq manna pingasunngornermi aggustip ulluisa 27-anni aalajangerpoq.
Naalakkersuisoqarfimmi pisortaq Svend Hardenberg taama aatsaarluinnaq nalunaarpoq.
- Ajuusaarutigisorujussuullugu ippassaq ulloq aggustip 27-ani nalunaaqutaq 17:12 maili Aviâja Helmsimiit, Københavnimi Sinniisoqarfimmi atorfimmi sulilernissaminik kissaateqarani nalunaarut tiguara. Eqqarsarluareerluni ilaquttanilu oqaloqatigereerlugit taamatut aalajangersimavoq, Svend Hardenberg ilaatigut allappoq.
Hardenberg: Atorfimmut tamakkiisumik piginnaaneqarpoq
- Aalajangernera atorfinitsitsinissamut ataatsimiititaliami siulittaasutut ajuusaarutigisorujussuuara, tassami atorfimmik isumaginninnissamut tamakkiisumik piginnaaneqarmat, Svend Hardenberg oqarpoq, nangillunilu:
- Aalajangiineq tusaatissatut tiguneqarpoq, aammalu maannakkut Københavnimi atorfiup inuttalerneqarnissaanut suliap ingerlaqqinnissaa nalilersortussanngorparput, Naalakkersuisoqarfimmi pisortaq Svend Hardenberg oqarpoq.
