Avissaartuutsitsiniartut uparuartorneqarput

- Inuiattut avissaartuunnissamut nukissaqanngilagut, oqarpoq. Kikkut avissaartuutsitsiniartuunersut siulittaasumut apeqqutigaarput:

- Ilaatigut maani, aammali avataaniit avissaartuutsitsiniarnerit ingerlanneqarput, minnerunngitsumik namminiilivinnissamut tunngatillugu avataaniit avissaartuutsitsiniarnerit maannakkut ingerlanneqarput.

Maannakkut avissaartuunnissamut akissaqaratalu nukissaqanngilagut. Aatsaat taamak pingaaruteqartigilerpoq allorassaaqatigiinnissarput. Tassami aatsitassarsiorneq aallartilerpoq, saarulliit takkutilerput, minnerunngitsumillu namminersorneq pillugu isumalioqatigiissitap isumaliutissiissutini atsioqatigiissutigeqqammerpaa. Taamaalilluta namminersulernermut alloriarnissarput qanittuaranngorparput. Nukiillu tamaasa tassani pisariaqartippavut.

- Suliffeqarfissuit avataaninngaanneersut namminneerlutik nunaqavissunik sulisoqarnissartik isumagisinaanngippassuk, avataaniillu sulisunik tikisitsiortulerlutik, taava isumaqarpunga maani sulisartut nunaqavissut inatsisiliornikkut illersorneqartariaqartut. Taamaalilluni nunaqavisut 100 procentimik atorluarneqarniassammata, massakkummi suliffissaaleqisut 1500-t missaanniimmata, taakkulu salliutillugit atorneqartariaqarput.

- Aluminiuliorfissap aamma tassunga atatillugu erngup nukkissiorfiliornissat sanaartornerini, piffissami tassani, avataaniit tikisitsisariaqassalluta nassuerutigisariaqarparput. Tamanna akueraarput, taamaattorli sanaartornermi nunaqavissut salliutinneqarnissaat piumasaraaput.

SIK-p siulittaasua, Jess G. berthelsen sulisartut ulluanni taama oqarpoq.