Aviisi: Piginneqatigiiffik Issittumi milliartilikkaanik aningaasaliiniarpoq
Aningaasaliinissamut piginneqatigiiffiit nunarsuarmi anginersaasa ilaat, Guggenheim Partners Issittumi annertuumik aningaasaliinissaminik pilersaaruteqartoq, aviisi Berlingske ullumi allaaserisaqarpoq.
Taakku anguniagaasa pingaarnersaat tassaavoq, Issittumi ataqatigiinnermut aaqqissuussinernut milliardinik tusintilikkaanik aningaasaliinissaq. Aningaasaliissutissallu aningaasaateqarfinnit Issittumi inuussutissarsiornerup sukkanerusumik ineriartornissaanik soqutiginnittunit assigiinngitsuninngaanniissapput.
Aamma atuaruk Atorfilittaq: Issittoq Danmarkip nunanut allanut tunngasunut politikkianut ilaatinneqarnerusariaqarpoq
Aamma atuaruk Issittoq pillugit ilisimatusarnerit annikillivigineqarnissaat ilisimatuut mianersoqqussutigaat
Taamatullu pilersitsiniarneq norskit nunanut allanut tunngasunut ministererisimasaannit, Jonas Gahr Støremit tapersersorneqarpoq. Taanna isummersuisuni tunngaviusumik aningaasaliinermi malittarisassanik pilersitsiniarsarisuni Global Agenda on Arcticimi ullumi pisortaavoq.
Gurgenheim Partnersimilu aningaasaliinissamut pisortaq suleqatigalugu Støre tunngaviusunik malittarisassaliorniarsarivoq, ilaatigut silap pissusaanut pinngortitamullu atuilluarnissamut malittarisassaliorniarsarilluni. Malittarisassallu taakku suliffeqarfiit Issittumi aningaasaliineranni malinnissaat pingaarsorineqarpoq.
Berlingske naapertorlugu, Guggenheim Partnersip 240 milliardit dollarsit, imaluunniit 1,64 billionit koruunit aningaasaliissutigisinnaavai.