Aviisi: Silap pissusiata allanngoriartornera Nunatta iluaqutigaa

Silap pissusaata allanngoriartornera Kalaallit Nunaannut iluaqutaavoq. Taama Candami naalagaaffiup pigisaata aviisia The Globe and Mail aningaasaqarnermut immikkoortortaminni allaaserisaqarpoq.
Allattoq Marianne Stenbæk, Montreal, Canada
juunip 20-at 2016 08:03
Nutserisoq Bibi Nathansen

Ilanngutassiami inuit nunatsinneersut arlallit issuarneqarput; ilaatigut Polar Seafoodip siulersuisuata siulittaasua, Henrik Leth.

Taassuma oqaatigaa silap pissusiata allanngoriartornera ajoraluartumik ajuusaarutigisinnaanagu, ataatsimummi isigigaanni Kalaallit Nunaannut iluaqutaammat.

Raajat qalerallillu akiisa qaffasinnerata pissutigalugu Polar Seafood 2015-imi akileraarutit peertinnagit sinneqartoorutaat 2014-imut naleqqiullugu anginerujussuusoq; 2015-imi 335 million koruuninik sinneqartoortut, 2014-imilu 235 million koruuninik sinneqartooruteqartut, Henrik Leth Globe and Mailimut oqarpoq.

Silap pissusaata allanngoriartornera pissutigalugu saarulliup kitaanut utersimanera piniartut aalisartullu nuannarutigigaat ilanngutassiammik allaatiginnittoq, Alister Doyle, isumaqarpoq.

Tusagassiortup Naalakkersuisut siulittaasuat, Kim Kielsen aamma issuarpaa; silap pissusaata allanngoriartornera iluaquteqarlunilu ajoquteqartoq Kim Kielsen issuarneqarpoq.

Aviisimi ilanngutassiaq Canadami soqutigineqarluartoq KNR-ip Canadami ilanngutassiortua Marianne Stenbæk nalililiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq