Avinneq inuusuttut ilaannut ajoqutaasarpoq
Angajoqqaat avissimasut qitornaat avissimanngitsut qitornaannut naleqqiullugit pinerluttuliorajuttunngortarput, napparsimakulanerullutik ilinniagaqarnerlunnerusarlutillu, tamanna Danmarkimi misissuinerup takutippaa.
septembarip 09-at 2010 08:01
Qallunaaqqat 35.000-t misissuivigineqarnerannit inernerugallartut tamanna ersersippaat, Avisen.dk-mi tamanna atuarneqarsinnaavoq.
Avissimasut qitornaannit taamaallaat 35 procentit 20-nik ukioqalersinnatik gymnasiami aallartittarput. Ilaqutariilli qitornaanni kisitsit taanna 60 procentiuvoq.
Misissuinermi aamma paasinarsivoq, avinnikut meeraat 20-nik ukioqaleraangamik pillagaasimanermut allaqartaqarnerpaasartut.
- Misissuinerma inernerigallagai uanga nammineq tupaallaatigeqaakka. Nunarsuaq tamakkerlugu misissuinerit siulliit una ilagaat, avittarnerlu qanoq sunniuteqartigisarnersoq paasigatsigu tupaallannaqaaq, ilisimatooq misissuinermi aaqqissuussisoq, Astrid Würtz Rasmussen, Aarhus Universitetimi aningaasaqarnermut PhD-iusoq, oqarpoq.
