Aviisit oqartussanit tapersersorneqarpallaannginnerat Tusagassiortut Peqatigiiffiannit eqqarsarnartoqartinneqarpoq

Demokratii inuttullu oqarsinnaatitaaneq piujuartinneqassappat Kalaallit Nunaanni naalakkersuisut tusagassiuteqarfinnik tapersersuinerusariaqarnerarpai.

Aviisit aningaasarliorneranut peqqutaatinneqartut ilaat ippassaq radioavisikkut eqqartorneqarpoq. Namminersorlutik Oqartussat annoncet akiinik 60-70 procentimik akikilliliiffigineqaqqusarsimanerat aviisinit akuersaarneqanngimmat pisortaqarfiit, qallunaat suliffissarsiortut nittartagaat atornerusalersimavaat.

Tamanna pillugu nunatsinni Tusagassiortut Peqatigiiffianni siulittaasoq Mariia Simonsen ima oqarpoq:

- Aviisit milligaluttuinnartunik isertitaqalernerat inuiaqatigiinnut

sunniuteqarpoq pitsaanngitsumik.

Aviisit allanik periarfissaqannginnamik piseqqusaarutinik inuttassarsiuinernillu annoncenik allanik pissaqanngikkunik sulisuminnut akissaqanngillat.

Taamaattumik inuit tamarmik nunatsinni oqartussaaqataanerat eqqarsaatigalugu, pisortat sipaartariaqalernerat taamarujussuaq aviisinut sunniuteqarnerat eqqarsarnartoqartorujussuuvoq.

Nunat avannarliit allat sanilliuffigisartakkagut tusagassiuteqarfitik aningaasatigut tapersersortarpaat, Mariia Simonsen oqarpoq aviisimmi pingaarnertut isertitarimmatigit annoncenit takoqqusaarutinit isertitat:

- Nunani avannarlerni allani demokratiskimik ingerlanneqartuni tusagassiutinik tapiissutinik tunisisoqartarpoq aviiseqartariaqarmat ataasiinaanngitsumik. Aviisit namminneq aqussinnanngisaminnik ajornartorsiulerunik, soorlu aningaasaqarniarnikkut, avataaniit aalajangersakkanik, taava unittuunnginnissaanik qulakkeerisunik tapersersuisoqarsinnaasarami. Periarfissat tamakkua nunatsinni nunguppaat. Aviisit toqujartuaartinneqarput arriitsunnguamik.

Tamatumalu kingunerisaanik, aviisini sammisat ikiliartornerat malugaa:

- Tusagassiortut ikilippata soorunami aamma sammineqartut ikilissapput,

isit siutillu ikilippata isigisat tusaasallu aamma ikilissapput. Aviisit sammisinnaasai malunnartorujussuarmik ikiliartorusaarput sulisuisa ikiliartornerat ilutigalugu.

Mariia Simonsen oqarpoq, imatullu naggasiilluni:

- Malunnartorujussuuvoq nutaarsiassalerisut ikiliartortut, atorfiit allat paasissutissiisartut tusagassiisartutut atorfiit amerliartorusaarput. Tusagassiat allaniit suliarineqartut amerliartorput, kisianni tusagassiortut kiffaanngissuseqarlutik namminneq suliaat ikiliartorusaarput. Tamanna immaqa pissaaneqartuulluni qujanarsinnaagaluarpoq, kisianni inuiaqatigiinni demokratiskiusuni taamatut ingerlaneq eqqarsarnartoqartorujussuuvoq demokratiimullu akerliulluni, tusagassiortut peqatigiiffianni siulittaasoq Mariia Simonsen oqarpoq.