Aviisit nunani tamaneersut Cairn angusinngitsoortippaat

Tysklandimi aviisip tatigineqarluartup, Der Spiegelip, allaaseraa, Cairn Energyp Kalaallit Nunaanni uuliamik siorna misissuinera iluatsissimanngitsoq.

Cairn Energy uuliamik gassimilluunniit piffinni pingasuni nassaaraluartoq, oqaatigineqarpoq nassaarfiit marluk atorneqarsinnaanngitsut, aviisimilu aamma allaaserineqarpoq, nassaarfigineqartoq ataaseq qimaannarneqarsimasoq.

Allaaserisallu tamaanga killeqanngillat, skotlandimiummi uuliasioqatigiiffissuat taanna nunarsuarmi inuussutissarsiorneq pillugu aviisit ingerlalluarnersaanni, Washington Postimi, ippassaq isornartorsiorneqarpoq.

Misissueqqissaartartoq Andrew Peaple tassani oqarpoq, suliffissuup aktiaatai akisuallaarujussuartut. Aktiat Indiami uuliamik qaloorinermi nalittoraluttuinnarsimapput, Cairnilli Kalaallit Nunaanni uuliaqarnissaa tatigivallaarsimavaa. Siunersuutigaalu Cairnimi aktiaateqaraanni taakku tuniniaqqullugit.

Naatsorsuutit nutaat, ilisimatuunit amerikamiunit suliarineqartut, Der Spiegelimi saqqummiunneqartut, takutippaat, issittumi uuliasiorneq manna tikillugu ilimagisamit pitsaatiginngitsoq.

Uuliamik aatsaat nassaartoqareerpat atorluarnissaa maannamut ilimagisamit akisunerujussuanngussaaq.

Ilisimatuut ukioq kingullerni oqaatigisarpaat, uuliat nappartat 7,5 milliardit Issittumi qaluneqarsinnaasut, amerikamiulli ilisimatuut, geologimit Don Gautier-imit aqunneqartut isumalluannginnerupput.

Nappartamulli ataatsimut aningaasartuutit 100 dollarsinik naleqartinneqassappata, isertitsissutaasussat pingajorarterutaannai isertinneqartussaasut naatsorsorsimavaa.

Nappartamut ataatsimut 300 dollarsinik akeqartitsissagaanni, ilimagineqarpoq uulia qaluneqarsinnaasoq affaannaassasoq.