Aviisinut tapiissut peerneqassaaq
Post Greenland aviisit nassinnerinut ukiumut 2 millioni koruunit missaannik aningaasartuuteqartarpoq, POST Greenlandilu aningaasarsiornermigut ilungersunartorsioraluttuinnarnermini tapiissuteqarnissaminut akissaqanngitsoq, Jens B. Frederiksen akissuteqarnermini oqarpoq.
Allakkat nassiussallu Danmarkimit Kalaallit Nunaannut nassiunneqartartut ikiliartornerat pissutigalugu, POST Greenland aningaasatigut ilungersunartorsiortinneqartoq, suliffeqarfiullu aningaasartuutiminik annikillisaaniarnermini aviisit nassiunneqartarnerinut tapiissutigineqartartup peerneqarnera sipaarniutit ilagigaat oqaatineqarpoq.
Naalakkersuisup Jens B. Frederiksenip erseqqissarpaa aviisit nassiunneqartarnerinut tapiissutit ikiliartortinneqarnissaat pilersaarutaajunnarsimasoq, tapiissutillu ukiormannamiit atorunnaarsinneqarnissaat pilersaarutaasoq, tamannalu naalakkersuisut allanngortinnianngikkaat.
