Aviisini sulisut ikilisarneqarput
Atuagagdliutini sulisut 19-iugaluartut maanna 13-iinnanngorput - septembari naammat sulisut marluk soraarsinneqarput ataaserlu nammineerluni soraarluni. Sulisunik pingasunik sisamanngormat soraarsitseqqittoqartoq, Atuagagdliutit nittartagaanni allaaserinnittoqarpoq.
Aviisip takoqqusaarutitigut isertitakilliartuinnarnera soraarsitsinernut ilaatigut patsisaatinneqarpoq.
- Pisortat takoqqusaarutinik saqqummersitseriaasiat taamaattuassagunarpoq, ajoraluartumillu Namminersorlutik Oqartussat kommunillu ilaat aalajangersimapput suliffissarsiornerminni takoqqusaarutitik, nunanut allanut ingerlatittarniarlugit, akisussaalluni aaqqissuisoq Inga Dora G. Markussen Atuagagdliutit nittartagaanni taama tunngavilersuivoq.
Aviisit nuna tamakkerlugu saqqummersartut aappaat, Sermitsiaq, sapaatip akunnerani matumani aamma soraarsitsisariaqarsimavoq. Sulisut pingasut ippassaq soraarsinneqarput aviisiliortutullu atorfiit marluk inuttalerneqaqqittussaagalugit taarserlugit atorfinitsitsisoqaqqinngitsoq, aviisip nittartagaani allaaserineqarpoq.
Sermitsiap akisussaalluni aaqqissuisua Poul Krarup, Atuagagdliutini akisussaalluni aaqqissuisutuulli oqaatigaa, aviisip aningaasatigut ajornartorsiornera pisortanit takoqqusaarutigineqartartut nunanut allanut nuunneqarnerannik patsiseqartoq.
Tamakkua saniatigut akisussaallutik aaqqissuisut taakku marluullutik oqaatigaat, nassiussuinermi tapiissutaasartup ukiortaamiit peerneqartussap, kingunerisaanik aviisit ukiumut millionilikkaanik annaasaqassasut.
