Aviisimi aaqqissuisoq parnaarussaassaaq

Kangia qiterlerniittumi illoqarfiup Yemen-ip aviisiani sapaatip-akunneranut saqqummersartumi Al-Rai Al-A-mi aaqqissuisoq ukioq ataaseq parnaarunneqartussanngorpoq aviisilu ukiup affaani matugallarneqartussanngorluni.

Sapaatip-akunnerata uuma naanerani Yemenimi eqqartuussivik taama aalajangerpoq.

Aaqqissuisoq Kamal al-Olufi pineqaatissinneqarnissami tungaanut iperagaaqqagallassaaq.

Oqaatigineqarporlu tusagassiortut peqatigiiffii pineqaatissiineq pillugu akerliussutsiminnik takutitsisimasut.

Olufimut pinerluutitut taaneqarpoq aviisip Jyllands Postenip nittartagaaniittoq Muuamaat quiassuaatigalugu titartagaq aviisimini naqinneqarnissaa akuersissutigisimammagu.

Ukiumi ataatsimi Olufip parnaarunneqarnerata saniatigut aammattaaq aviisimi taamatut saqqummiussisoqarnera pillugu nunami aviisit arlallit akiligassinneqarputtaaq.

Qaammatip tulliani aamma illoqarfiit pingaarnersaanni Sana-mi alla aviisi assingusumik pillaatisissasoq oqaatigineqarpoq.