Aviisiliortoq: Kalaallit Nunaat takornariarfissatut tulluulluinnarpoq
Amerikamiut canadamiullu aviisiliortut takornariaqarnermillu suliaqartut 75-it Air Greenlandip timmisartorsuanut Norsamut ilaallutik novembarip ulluisa qulingiluaanni USA-liaqqissapput.
Berne Broudy aviisiliortuuvoq assiliisartuullunilu misigisassarsiorlunilu takornariarneq immikkut sammisaralugu nunarpullu tiguartiffigilluinnarsimagunarpaa.
- Angalanera naliitsuuvoq. Inuit naapitakka takornariakkavullu nuannerluinnartuupput – Kalaallit Nunaat ilisimasaqarfiginngivillugu maanngarpunga – maannalu qanoq ilillunga maanngaqqinnissannik aaqqissuussinissara eqqarsaatigilereerpara, Berne Broudy oqarpoq. Taanna novembarip ulluisa arfineq-aappaassaanni Air Greenlandip tikeraartui Amerikamiut Canadamiullu Katuamut qaaqquneqarmata ilaavoq. Taakkua kalaallit nerisassaataannik nerisinneqarput, atisalianik takutitsivigineqarlutik kiisalu nipilersornermik uaajeernermillu misigisaqartinneqarlutik.
Kisianni illoqarfimmi inuuneq Berne Broudy-p takornarianut allaaserisassaani pingaarnerunavianngilaq.
- Isumaqarpunga Kalaallit Nunaat misigisassarsiorluni takornariaqarnermut naleqqulluinnartuusoq – tassa inunnu t feeriarnerminni oqaluffissaarsuarnik katersugaasivinnillu takusaqarusunngitsunut, kisiannili pinngortitamik nunallu kulturianik misigisaqarusuttunut, Berne Broudy oqarpoq.
- Taamaattorli Kalaallit Nunaanni unnuiffigineqarsinnaasut ineriartortinneqarsinnaapput. Hoteliinnaanngitsut, kisianni illuaqqat illuinnaallu asimiittut imaluunniit nunaqarfinniittut – illoqarfissuarnut ungasissuniittut – takornariat maanimiut kulturiannik naapitsiffigisinnaasaat. Tamanna soorunami maanimiut tapersersuinerisigut pissaaq, kisianni taamatut takornariartitsisarneq iluatsittumik USAmi, Canadami, Afrikami nunarsuarmilu sumiiffinni allani ingerlanneqarpoq.
Kalaallit Nunaat periarfissanik ulikkaarpoq – ilaat aallartinneqareerput – ilaallu ineriartortinneqartariaqarlutik, kisianni angalaffissatut piukkunnartorujussuuvoq – nunarsuarmiut tamanna paasileriarpassuk, Berne Broudy oqarpoq.