Aviisi utoqqatsertoq ilassaaleqivoq
Muuamaamik ilaarutiginnilluni titartaasoq Kurt Westergaard politiit isertortumik paasiniaasartut naapertorlugit Tunesiamiunit marlunnit toqoriarneqarsimagaluartoq tapersersorlugu Danmarkimi aviisit ullormut saqqummersartut titartakkat naqiteqqippaat.
Politikenip maanna suliniaqatigiiffinnik arfineq-pingasunik profetip Muuamaap kinguaavinik 95.000-iusunik inuttaqartunik isumaqatigiissuteqarpoq. Aviisilli titartakkanik saqqummiusseqqinnissaminut pisinnaatitaanini taamaatinngilaa aammalu titartakkat taakkua tamanut saqqummiunneqarnerat utoqqatsissutiginngivillugu.
Utoqqatserneq muslimit narrunarsagaasimasutut misigisimanerannut taamaallaat atuuppoq.
Qallunaat tusagassiuuteqarfii qiviaraanni Politiken aviisillu aaqqissuisuunera Thøger Seidenfaden profetip Muuamaap kinguaavinik isumaqatiginninniarnissaminni utoqqatsernissaminnut ilassaaleqisorujussuupput. Thøger Seidenfadenip aalajangernini ima tunngavilersorpaa:
- Inuiaqatigiinni qallunaani oqaloqatissaaleqinarsimaqaaq illuatungeriillu qanoq eqqarsarnerat qanorlu misigisaqarnerat tusassallugu assorsuaq ajornakusoorsimalluni, tammannalu tamanut atuulluni, maannalu tassa oqaloqatigiinnissaq pimoorutilerparput.
Thøger Seidenfaden aaqqissuisuunerit amerlaqisut assigalugit kikkut tamarmik naqisimaneqanngitsumik saqqummiussisinnaanerannik akikinaariniartutut pasillerneqarpoq, kisiannili Politikenip Thøger Seidenfadenillu pineqartumi matumani kikkut tamarmik naqisimaneqanngitsumik saqqummiussisinnaanerat pinnguarinngilaat.
Kikkut tamarmik naqisimaneqanngitsumik saqqummiussisinnaanerat tunngavimmigut innarlerneqarsimappat, atuartartut ilaat aviisimiittut aqqutigalugit narrutsatsinneqarsimanerat ullut tamangajaasa qallunaat aviisiini pitsassuarni pisarpoq, atuartartuvullu oqaloqatigisarpavut akissutaallu tusarnaartarlugit, isummallu akerleriittaraluartut siunissami aamma taamaaliortassalluta, soorunalimi aamma eqqarsarluartassalluta kingornatigullu oqaloqatigiinnermut tassunga atasumik akissuteqartassalluta.
Politikkikkulli partiit amerlanerpaartaasa Politikenip kikkut tamarmik naqisimaneqanngitsumik saqqummiussisinnaanerannik akikinaarsivallaarneranik assuarigaat, Det Radikale Venstret siornatigullu nunanut allanut ministeriusimasup Uffe Ellemann Jensenimi aviisi tapersersorpaat.
Aammattaaq Danmarkimi muslimimik upperisallit kattuffiata Politiken utoqqatserneranut nersualaarpaat isumaqaratillu tamanna kikkut tamarmik naqisimaneqanngitsumiik saqqummiussisinnaanerat akikinaarneqartoq.
