Aviisi: Kinamiut milliardilikkaanik nunatsinni aningaasaliilersaarput
![](/sites/default/files/styles/image_934x467/public/article_images/havnen_set_fra_orsiivik_630_3.jpg?itok=jdg4QmuZ)
Pilersaarutit aningaasarpassuarnik naleqarsinnaasut ilaat pillugu Kinap præsidentiata Hu Jintaoip Danmarkimut pisortatigoortumik sapaatip-akunnerata tulliani tikeraarnerani isumaqatigiissutigineqarsinnaassagunarput, atsiorneqarlutilllu.
Nuummilu Ilulissanilu mittarfiit tallineqarnissaat pillugu Kinamiut 170 millionit koruuninik aningaasaliiniartut, Qaqortumilu mittarfiliornissamut 640 millionit koruuninik aningaasaliiniartut, Berlingske Business allappoq.
Nuummi umiarsualiviup 400 millionit koruunit missaannik naleqartumik allineqarnissaa aamma isumaqatigiissusiorfigineqassasoq oqaatigineqarpoq.
Berlingske Businessilli saqqummiussai Nunatsinniit oqaaseqarfigineqarumanngillat.
- Periarfissat tamarmik ammatinneqarput. Pilersaarutinut taaneqartunut atatillugu Kinamiut ilumut aningaasaliiniarnersut uppernarsarsinnaanngilara, Attaveqarnermut Ineqarnermullu Naalakkersuisoq Jens B. Frederiksen Berlingske Businessimut oqarpoq.
Nunalli allat Nunatsinni uuliasiorniarlutillu aatsitassarsiorniassappata nunap atortulersugaanera nutarterneqarlunilu pitsanngorsaavigineqartariaqarpoq, avataaniillu aningaasaliisoqarlunilu aningaasanik attartortoqartariaqartoq, aviisimi allaaserineqarpoq.
- Naalakkersuisut nunarsuarmioqatitsinnik pingaartitsisuupput, nunatsinnillu suleqateqarumasut suleqatigerusuppavut. Aamma Kinamiut aningaasaleerusuttut, piumasaqaativut naammassisinnaassappassuk. Kinamiulli tyskilluunniit Danmarkimeersulli atortulersugaanitsinnik pitsanngorsaaniarlutik nalunaarsimanersut oqaatigisinnaanngilara, Jens B. Frederiksen Berlingske Businessimut oqarpoq.