Aviisi: 1000 koruuni atuukkunnaarsikkiartorneqalerpoq

Naalagaaffiup aningaaserivissua Danmarkimilu naalakkersuisut tusind koruuni atuukkunnarsikkiartorniarpaat.

Nutaarsiassaqartitsivik Børsen tusarfiit pilersaarutinut ilisimannittut aallaavigalugit taama allaaserisaqarpoq.

Tamannalu piffissami killilimmi tusind koruunip aningaasanut allanut taarserneqarsinnaaneratigut pissaaq.

Aningaasallu allanut taaserneqanngippata tusind koruuni atorsinnaajunnaassaaq naleerullunilu.

Aningaasanut allanut Danmarkimi kingullermik taarsiisoqarmat tamanna Sorsunnersuup Kingulliup kingorna pivoq.

Pinerlunniat aningaasanik amerlasuunik tigummiaqarsinnaassusaat pilersaarutit aallaavigalugit eqqorneqassasoq, nutaarsiassaqartitsivik Børsen allappoq.

Nutaarsiassaqartitsiviup tusarfii malillugit Danmarkimi Naalakkersuisut taassuma saniatigut aningaasanik qanoq amerlatigisunik akiliisinnaaneq killeqalersissinniarpaat.

Aningaasanik tigummianik amerlanerpaamik 20.000 koruuninik akiliisoqarsinnaanera 2021-mi eqqunneqarpoq. Siornatigut tamanna 50.000 koruuniugaluarpoq.

Aningaasat tigummineqartut Danmarkimi 2022-p naanerani 68,9 milliardit koruuniusut Naalagaaffiup Aningaaserivissuata Børsenimut oqaatigaa. Taakkunannga 36,5 procentii 1000 koruunikkaartuupput. Allatulluunniit oqaatigalugu 25,2 milliardit koruuniullutik.

Børsenip paasissutissaatai Naalagaaffiup Aningaaserivissuata oqaaseqarfigiumanngilai.