Avataq mianersortumik isumalluarpoq
Ullup qeqqanut Radioaviisimi upalungaarsimanissaq pillugu Naalakkersuisut ammanerusumik pissusilersornialernerannik nutaarsiassaq, ICC-ip suliniutitut pitsaasutut oqaatigaa. Maannalumi aamma avatangiisit pillugit suliniaqatigiiffik Avataq isumalluarnerulaalerpoq.
- Ammanerulernissap allaqqussinnaannginnera Naalakkersuisut paasilersimammassuk Avatap tungaaninngaanit pitsaasutut isigaarput. Takoqqaarallartiguli aggustip 15-iata kingorna qanoq pisoqassanersoq. Tassami ilisimaqqissaanngilarput upalungaarsimanissamut tunngatillugu Naalakkersuisut uatsinnut suna saqqummiunniarneraat,
taama oqarpoq peqatigiiffimmi siulittaasoq Mikkel Myrup. suliniutinilu annertuuni tamani ammanerulernissamut taanna aallarniutaasinnaassasoq taassuma neriuutigaa.
- Uuliasiornerinnarmut tunngassuteqanngilaq, kisiannili aamma suliniutinut annertuunut maanna ingerlanneqartunut tamanut tunngassuteqarpoq. Pingaartumik eqqarsaatigaakka Aluminiumik aatsitsitsiviliornissamik saviminnissamillu piaanissamik pilersaarutit. Suliniutinut taakkununnga atatillugu oqartussaaqataalernissamut una aallarniutaasinnaappat, tamannalu siunissami pilersaarusiarsuarnut tunngatillugu innuttaasut eqqortumik paasitinneqartalissappata, tamanna pitsaasutut isigaarput, taanna oqarpoq.
Taamaattorli upalungaarsimanissamut pilersarut tamakkiisoq saqqummiunneqartinnagu Avataq naammaginnilernianngilaq.
- Soorlu assersuutigalugu upalungaarsimanissamut pilersaarut tamakkiisoq kikkunnit tamanit Danmark-imi takuneqarsinnaasoq. Soorunalimi oqarasuatit normuisa ilaat isertuussaassappata tamanna paasisinnaavarput, kisiannili tassa upalungaasimaneq pillugu pilersaarutip tamakkiisumik ammasuunissa piumasaraarput.
