Avatangiisit silallu pissusaa ataatsimeersuarnermi sammineqarput
Ataatsimeersuarneq Lissabonimi Portugalimiittumi pivoq. Arkalo Abelsen Fransk Polynesiami avatangiisinut ministeri Georges Handerson peqatigalugu EU-kommissionimit qaaqquneqarsimavoq, Kalaallit Nunaanni silap allanngoriartornera naleqqussarnerlu pillugit nunat nunasiaasimasut OLT-nik taagorneqartut isumaannik saqqummiusseqataasussanngorlugu.
Lissabonimi ataatsimeersuarneq qulequtaqartinneqarpoq ”European Development Days”, ataatsimeersuarnermilu siunissami silap avatangiisillu pitsanngoriartortinnissaannik siunertaqartumik ineriartortitsiuarnissaq pillugu saqqummiussisussatut oqalliseqataasussatullu nunat ineriartortitat arlallit qaaqquneqarsimapput.
Ataatsimeersuarneq Portugalip ministeriuneranit Socratesimit kiisalu EU-kommissionip præsidentianit Barossomit ammarneqarpoq. Oqalugiartussat pingaarnerit ilagaat: Naalagaaffiit Peqatigiit qullersarisimasaat Kofi Annan aamma EU-p Ineriartortitsineq pillugu kommissæria Louis Michel, tassani Arkalo Abelsen ilaatinneqarluni.
Arkalo Abelsen oqalugiaammini qulequtaqartumi: ”Mianernassuseq aamma silap allanngoriartorneranut naleqqussarneq” ilaatigut oqarpoq: nunat OLT-nik taagorneqartut tassaasut qeqertat niuerfinnut ungasissumiittut kiisalu killilimmik aningaasaateqartut. Qeqertat uumasunik nerisaqaqatigiinnik pisuussuteqarput, taakkuli mianernartuupput silallu allanngoriartornera qanimut timitarsisarpaat. Nunat OLT-nik taagorneqartut kissaatigisimavaat, silaannaap allanngoriartornera pillugu nunarsuarmi akiuiniarluni suliniuteqartunut tapersersuisoqassasoq. Tassani Kalaallit Nunaata siunnersuutigaa, ataatsimoorluni anguniakkani EU nunanut OLT-nut siunnersuisartutut inississasoq.
