Avatangiisit qitiutillugit suleqatigiinneq
Suliniut aallaqqaammut Nuummi ingerlanneqassaaq kingusinnerusukkut sineriammut siammarterneqarumaarluni. Suliffeqarfiit suliniarfigineqarnerat GrønlandsBankenimi maajip 21-at aaqqissuussinikkut aallartinneqassaaq. Suliffeqarfiit saliinerat juunip 14-at pissaaq aaqqissuisullu neriuutigaat allat aamma peqataanissamut soqutiginnikkumaartut.
- CSR tunngavigalugu iliuuseqarniarluni suliniutip pitsaasup ilarpassuisa siaruariartulernerat takusinnaalerlugu Kalaallit Nunaanni Sulisitsisut Peqatigiiffiannut nuannerpoq. Aamma avatangiisitsinnut nalituunut pinngortitamullu asseqanngitsumut akisussaassuseqartumik iliuuseqarnissamut tunngatillugu, Sulisitsisut Peqatigiiffianni GA-mi siulittaasoq Henrik Sørensen oqarpoq.
CSR Greenlandip avatangiisit pillugit suliffeqarfiit CSR Greenlandimi peqataasut pikkorissarniarpai Nuummi maajip aqqarnat, Sisimiuni maajip 14-at Ilulissanilu maajip 16-at.
Atuarfiit peqataanerat sapaatip akunnera 22 aamma 23 pissaaq tassani atuartut angajulliit Mads Lumholt peqatigalugu avatangiisit sammineqassammatigit.
- Kalaallit Nunaanni pinngortitarsuaq nuannareqaata paarilluarneqartariaqartutullu isigalugu. Taamaammat "Saligaatsoq" aallartinniarlugu suliniuteqalersimavunga, Mads Lunholt oqarpoq, neriuutiginerarpaalu suli amerlanerit peqataalernerisigut Saligaatsoq iluatsilluarumaartoq.
Innuttaasut aamma peqataasinnaapput aasalernerani saliinersuarmi taannalu avatangiisit pillugit FN-ip ullorititaani juunip tallimaani pissaaq. Tassani avatangiisit samminerisa saniatigut assigiinngitsunik sammisassaqartitsisoqassaaq sammisamut attuumassuteqarsinnaasunik.
- Piffissami sivitsulersumi avatangiisit pillugit iliuuserisat pitsanngorsarniarlugit Kommuneqarfik Sermersooq suliaqarsimavoq – minnerunngitsumik eqqagassanut tunngatillugu. Avatangiisut pillugit suliaqarneq Kommuneqarfik Sermersuup pingaartippaa, soorunami kivitseqatigiilluni suliniarnermut aammalu avatangiisit oqaluuserineqarnerulernissaannut peqataarusuppugut, Kommuneqarfik Sermersuumi borgmesteri Asii Chemnitz Narup oqarpoq.