Avatangiisit pillugit unammisitsinermi ajugaasut saqqummiunneqartut
Ajugaasut tassaapput Qeqertarsuup Atuarfiani 2. klassimi atuartut aamma Inger Jeremiassen Kitsissuarsunneersoq.
Facebookikkut unammisitsineq Qujanaq pingasunngornermi novembarip ulluisa 16-ianni naammassivoq, nunalu tamakkerlugu peqataaffigineqarluarsimasoq, Namminersorlutik Oqartussat nalunaarput.
Aamma atuaruk Eqqakkat pillugit taallioqataagit 5.000-inillu pinnallutit
Versit 100-erpiaat saqqummiunneqarput, aammalu versit marluk arlaat pitsaanerpaatut toqqarniarneqarneri ajornaatsuinnaasimanngitsoq, Avatangiisinut Naalakkersuisoq Suka K. Frederiksen oqarpoq.
Versit ajugaasut Facebookkimut ilineqassapput, taakkulu erinarsuummut "Qujanaq"-mut ilanngunneqassallutik.
Julie Berthelsen erinarsuut "Qujanaq" atorlugu marloriarluni februaarimi tusarnaartitsissaaq, tassungalu atuartut peqataatinneqassapput. Tassani erinarsuut "Qujanaq" nutaaq tamakkerlugu erinarsussavaat.