Avatangiisit pillugit ministererpassuit Bali-mi ataatsimiipput

Ministerit 26-t Aasiameersut Europameersullu sapaatip akunnerata tulliani Danmarkimi ataatsimeeqatigiissapput ataatsimiinnerullu kinguneranik nunat Aasiamiittut Kyoto-mi isumaqatigiissutip nutarterneqarnissaanut piumassuseqalersinniarneqassapput.

Ataatsimiinneq pisortatigoortuunngilaq aalajangersimasumillu anguniagaqarfiunani. Taamaattorli sapaatip akunnera tullianik naappat ministerit silaannaap pissusaa ataavartunillu nukissiuuteqarneq oqallisigineqareerpata Aasiamiut nikeriarsimanissaat neriuutigineqarpoq.

Taama neriuuteqartoq tassaavoq Danmarkimi avatangiisit pillugit ministeri Connie Hedegaard, naalagaaffiit peqatigiit silaannaap pissusaa pillugu decembarimi ukiumoortumik Bali-mi ataatsimiilerpata isumaqatigiissummik nassataqarnissaminik kissaateqartoq.

Ministererpassuit Aasiameersut Europameersullu ilaatigut oqaluuserissavaat ataavartunik nukissiuuteqarneq nungusaataanngitsumillu orpinnik atuineq, aammattaarli Aasiamiut avatangiisit aamma aningaasatigut ineriartortitsinerup qanoq immikkoortinnissaat eqqartussavaat, taamaalilluni inuiaqatigiit ineriartorneranni avatangiisit pilliutigineqannginniassammata.

Ataatsimiinneq iliuuseriniarneqartunut pingaaruteqarpoq, tassami nunarsuatsinni avatangiisinut ministerit Bali-mi ataatsimiinnissaannut ukiup affaa sioqqullugu ingerlanneqassammat, tassanimi silaannaap pissusaa pillugu Danmarkimi 2009-mi ataatsimeersuarnermi suut oqaluuserineqassanersut aalajangiunneqassammat.