Avatangiisit pillugit ilisimatusarfiliorusupput
Helge Sander oqarpoq isumaqatigiissut naapertorlugu nammineq aningaasartai, tulliani aningaasat pillugit isumaqatigiinniartoqalerpat isumaginiassallugit. Nuummi Ilimmarfiup Pinngortitaleriffiullu akornannut Ilisimatusarfiup inissinneqarnissaa siuniuneqarpoq. Avatangiisit pillugit Ilisimatusarfissaq ilisimatuunit marlunnit aqunneqassaaq, tassa Inuiaqatigiit pillugit ilisimatooq ataaseq aappaalu Pinngortitaleriffimmi atorfilik ulluinnarni aqutsisussaq. Ilisimatusarfissami ilinniarfigineqarsinnaasut assigiinngitsut pingasuusapput imminnut akulerunneqarsinnaasut, tassa Pnngortitaq Avatangiisillu pillugit ilisimatusarneq, Inuiaqatigiit Inuussutissarsiornerlu pillugit ilisimatusarneq pingajuattullu teknikki sanaartornerlu. Isittumi pissutsit aallaavigalugit ilisimatusarfissami silap pissussaa sammineqassaaq. Helge Sanderilu oqaluttuarpoq silap allanngoriartornerata sunniutai issittumi malunnarnerussammata Ilisimatusarfiup Nuummiinnissaa siunniunneqarsimasoq. Siunissami silaannaap allanngoriartornera malittaralugu inuiaqatigiit ineriartortinnissaat anguniarneqassaaq. Suliassap ingerlanneqarnissaanut aningaasartuutissanik tapiissutigineqartussaat Folketingimi akuerineqassappata siullermik ukiuni sisamani ingerlanneqarallassaaq, tassa tullianik aningaasanut inatsisissap isumaqatigiissutiginiarneqarnissaata tungaanut. Avatangiisilli pillugit Ilisimatusarfissap ingerlaavarnissaa Helge Sanderip ilimaginerarpaa.
Isumaqatigiissusiaq Tommy Marøp iluarisimaarnerarpaa ilisimatuullu silap pissusaanik misissuisut 300-t missaaniittut Kalaallit Nunaanniinnerarlugit.
Ilisimatuut misissuinermikkut paasisatik angerlamut aallakaagunik ilisimalikkatik angerlaatissavaat.
Siunissamili avatangiisit pillugit Ilisimatusarfeqalerpat paasisat Nunatsinniiginnartalissapput, taassumalu saniatigut suliffissanik pilersitsissalluni.
