Avatangiisit mingutsinneqarataannaapput
Umiarsuaq uuliamik assartuisartoq amigartunik inuttaqartinneqarluni immikkut nunatsinni assartuinissaminut akuerineqarsimammat, nunatsinni avatangiisit mingutsinneqarsinnaanerat Danmarkimi umiartortut kattuffiata ernummatigaa.
Umiarsuaatileqatigiiffiup M.H. Simonsenip uuliamik assartuutitaavat, Orasilamik atilik, 1.700 tonsitut oqimaatsigisoq, marlunnik umiarsuarmi ikiortinik sungiussilluarsimasunik, ataatsimillu suli sungiussilluarsimanngitsumik ilinniartulik, 2 million liiteringajannik uuliamik usisoq, nunatta imartaani assartuinissaminut Imarsiornermut Qullersaqarfimmit akuerineqarsimavoq.
- Umiarsuup angalaffissaa apeqqutaatillugu inuttaliisarnissaq malittarisassani erseqqissumik allassimavoq. Kalaallit Nunaanni kitaata kujataani imartaq navianarluinnartutut isigineqartariaqarpoq tamaani anorlerajulluni, ikkarloqarluni sikorsuaqartarmat, Danmarkimi umiartortut kattuffianni allaffimmioq Morten Bach kattuffiup nittartagaani taama allappoq.
Uuliamik assartuutip Orasilap nunatta imartaani erngartuuleqatarsinnaanera Danmarkimi umiartortut kattuffianit ernumagineqarpoq.
- Umiarsuup uuliamik assartuutip Exxon Valdezip 1989-imi Canadap sineriaani ajutoornera eqqaaginnarlugu Kalaallit Nunaata sineriaani uuliamik mingutitsisoqassappat qaqugumorsuaq ajoqusiisinnaasut takorloorneqarsinnaapput. Umiarsuarni inuttat amigartut qasulernerisa kingunerisaanik umiusoqartarpoq imaatigullugu ajutoortoqartarluni, Morten Bach oqarpoq.
Danmarkimi umiartortut kattuffiata Imarsiornermut Qullersaqarfiup akuersissuteqarsimanera maanna imaatigut angallannermi naammagittaalliortarfimmut naammagittaalliutiginialersaarpaa.
Morten Bach isumaqarpoq, Orasila nunatsinni angalassaguni ikinnerpaamik pingasunik umiarsuarmi ikiortinik sungiussilluarsimasunik ataatsimillu sungiussilluarsimanngitsumik inuttaqarluni angalanissaa akuersaarneqarsinnaassasoq.
