Avatangiisit illersornerinut ilisarnaatit qalerallit akii apparsarsinnaavaat
Ilisarnaatit MSC-mik taagorneqartut atulernissaannik piumasaqaat qanilliartorpoq. Qeqertaq Fish nunaqarfimmi Ilulissat avannaanni tunisassiortuusoq ingerlataminik annertusaavoq. Ingerlatseqatigiffilli siorna 75 millioner koruuninik kaaviiaartitsisoq ernumavoq pisisartutik piumasaqalissappata qalerallit MSC-mik ilisarnaatillit kisimik pisiarisarniarlugit.
- Suliffeqarfinnguatsinnut annertuumik sunniuteqarsinnaavoq qalerallit nunatsinneersut MSC-mik ilisarnaateqarnissaat piumasaqaataalissappat Kalaallit Nunaat suli MSC-mik pissarsisinnaanngitsoq. Aningaasarpassuit uani eqqartorneqarput, Qeqertaq Fish-imi siulersuisut siulittaasuat Erik Nielsen KNR-imut oqarpoq.
Qeqertaq Fish Qeqertami tunisassiornermi saniatigut nunaqarfimmi Akunnaami immikkoortoqarfittaaqqammerpoq maannalu misissorlugu Kitsissuarsunni immikkoortoqarfittaarsinnaaneq.
MSC-mik ilisarnaatit pilersinneqarput avatangiisinik illersuiniaqatigiiffimmit WWF-mit aamma Unileverimit. Ilisarnaat taanna tungujortumik qalipaatilik uppernarsaatitut atorneqarpoq aalisakkanik nioqqutissat pisiniarfinni nillataartitsivinniittut nungusaataanngitsumik pisarineqarsimasut.
Qallunaat pisiniarfiisa aalisakkat nioqqutiminnit piiarpaat
Dansk Supermarked, Føtex-mik, Netto-mik Bilka-millu piginnittuusoq pisiniarfinni nillataartitsivinnit aalisakkanik arlalinnik piiareerpoq taakku MSC-mik ilisarnaateqanngimmata.
- Siorna qalerallit 3.000 tonsit avammut nioqqutigaavut ukiormannalu naatsorsuutigaarput 2.000 tonsit missaat avammut nioqqutigissallugit. Taamaammat sakkortuumik eqqorneqariaannaavugut tunisassiavut pisiariumaneerutissappata MSC-mik ilisarnaateqannginneq pissutigalugu, Erik Nielsen oqarpoq.
Kangaamiut Seafood aalisakkanik nunatsinneersunik nunanut allanut nioqquteqartartoq aamma qulanngilaq ineriartorneq sumut ingerlanersoq. Taakku ilaatigut qalerallit Qeqertaq Fish-imeersut Asiamut nioqqutigeqqittarpaat.
- Ilimanarpoq aalisakkat MSC-mik ilisarnaatillit aamma tassannga ilisarnaateqanngitsut siunissami akimikkut assigiinngissuteqalerumaartut, Kangaamiut Seafood-imi pisortaq Ulrik Bjerre Rasmussen KNR-imut oqarpoq.
Taassumali erseqissarpaa suli piffissaqartoq.
- Asiamut tuniniartakkatta ilagaat qalerallit Qeqertaq Fish-imeersut taakkulu suli Asia-mi piumaneqarluarput tassani MSC-mut ilisarnaat suli piumasaqaataanngilaq. Kisinni siunissaq ungasinnerusoq isigalugu ilimanarluinnarpoq taamatut piumasaqartoqalerumaartoq, Ulrik Bjerre Rasmussen oqarpoq.
- MSC-mik ilisarnaammik peqarnissamik piumasaqaat Europa-mi Amerikallu avannaani takussaaneruvoq. Taamaammat niuerfinnik nutaanik nassaarniassagutta ilimanarsinnaalluarpoq MSC-mik ilisarnaammik peqarnissaq piumasaqaataassasoq, Ulrik Bjerre Rasmussen oqarpoq.
Qaleralinnik tunisassiat nunatsinneersut MSC-mik ilisarnaateqalernissaannut qinnuteqaat suli piareernikuunngilaq. Qinnuteqaateqassagaanni piumasaqaataavoq aalisarnerup ingerlannissaanut aalajangersagaq takutinneqarsinnaassasoq tassuuna uppernarsarneqassammat nungusaataanngitsumik aalisartoqartoq.
Qaleralinniarnerup ingerlannissaanut pilersaarut Naalakkersuisut suli suliaraat. Tassani ilaatigut aalajangersarneqassaaq qaleralinniarsinnaanermut uppernarsaatit nutaat ukiuni tulliuttuni tunniunneqartassanngitsut aammalu pisasseeqqittarnerit unitsinneqassasut.
