Avatangiisit allanngoriartuaarnerat malinnaavigisinnaavatit
Naalagaaffiit Peqatigiit FN qarasaasianullu programiliortartut Google Earth suleqatigiinnerisigut nunarsuatsinni avatangiisit allanngoriartuaarnerat malinnaavigineqarsinnaanngorput.
Sumiiffiit assigiinngitsut 100-t alaatsinaaffigineqarput, satellitimiillu assilisat taakkunaneersut alakkarneqarsinnaallutik.
Nunarsuatsinni pissutsit qanoq issusiat FN-imit assitalersorniarneqarsimapput, tamakkuuppullu Google Earth-imi alakkarneqarsinnaasut.
Assilli Google Earth-imi nassaarineqarsinnaasut tamaanga killeqanngillat. Sumiiffiit assigiinngitsut tikikkuminaassinnaasut assiutigineqarput, assersuutigalugulu sermit iigartartut aakkiartornerat, Amazonasip orpippassui nungukkiartornerat, kiisalu Afrikami naalagaaffimmi Chad-imi tatsit paqqersimasut assiutigineqarlutik.
Kinami illoqarfiit alliartornerujussuisa avatangiisinut kingunerisinnaasai Google Earth-imut iseraanni aamma takuneqarsinnaapput. Aviisi Ingeniøren taama allappoq.
