Avatangiisinut ministerit akisussaasuussapput

Nunani issittuni avatangiisinut ministerit Ilulissani ataatsimiinnerminni ataatsimut akisussaaqatigiinnissaq isumaqatigiissutigaat. Tassami Nunani Issittuni Siunnersuisoqatigiinnit kaammattuutigineqartut malinniarnissaat suliassarissavaat, Danmarkimi avatangiisinut ministeri Karen Ellemann oqarpoq.

- Nunani Issittuni Siunnersuisoqatigiit avatangiisit innarlitsaalineqarnissaannut kaammattuutinik saqqummiussaqarpata, taava uagut tassaassaagut ataatsimoorluta takkuninnga naammassinninniartussat, Karen Ellemann oqarpoq.

Tamannalu nukinginnarpoq. Siku aakkiartorpoq umiartornerulernissarlu ilimanarsilerluni.

- Umiarsuit angallannerulerpata taava pinngortitami assissaqanngitsut aseruiffigineqarnissaat navianartorsiortinneqalersinnaavoq, tamatumalu pinaveersaartinnissaa piareersimaffigisariaqarparput. Umiarsuit angallannerisa avatangiisinik aseruinnginnissaat qanoq qulakkeerniassavarput?

Karen Ellemann oqarpoq nangillunilu:

- Imaalluarsinnaavoq siunissami ungasinnerusumi nunap ilai immikkut ittut innarlitsaalineqalersut, tassa imaani immikkullu ittumik umiarsuartigut angallaviit. Umiarsuarnut takornariartaatinut immikkut piumasaqaatit, soorlu tamakkua imikoq igissagaangassuk allallu taamaqaataat.

Taassuma tamatumunnga peqatigitillugu neriorsuutigaa nunani issittuni avatangiisinut ministerit suliassaq pimoorullugu tigussagaat ilungersorlutillu suliarissallugu.

- Annertuumik peqataatinneqarpugut, tassami maani ullorpassuarni nal. akunnerpassuinilu nerriviusaq kaajallallugu issiareerpugut tassa taavannguarlu pappiara uppernarsaatissaq pingaarutilik akisussaassutsimik tamatuminnga naqissusiisoq pillugu isumaqatigiilluta, tassalu ataatsimoorlutalu akisussaaffeqarnitsinnik.