Avatangiisinik mianerinnittut inassutigeqquaat
Nunat Avannarliit Siunnersuisoqatigiiffiata Pinngortitamut Avatangiisinullu tunngatillugu nersornaasiuttakkani, danskit koruuninngorlugit 350.000-inik aningaasartalik, aappaagu 16-issaa tunniutissavaa.
Nersornaasiunneqartartoq 2010-mi tunniunneqassaaq nunani avannarlerni suliffeqarfimmut, suliniaqatigiiffimmut, tusagassiorfimmut inummulluunniit maligassiuisumik tunniusimallutillu sulissuteqarsimasunut aningaasanik aqutsinermi ungasissumut siunnerfilimmik piujuaannartitsinissarlu qitiutillugu sulinissamut aningaasanik niuerfinnik, aningaasanik aqutsinermik ingerlatsivinnik, aningaaserivinnik siunnersortinilluunniit sunniiniarlutik toqqaannartumik toqqaanngitsumilluunniit suliniuteqarsimasunut.
Nersornaaserneqartussaq eqqortoq nassaariniarlugu maanna Nunat Avannarliit Siunnersuisoqatigiiffiat, pineqartumi tusagassiuineq, oqalugiartarnerit, atuakkiat assigisaalluunniiit aqqutigalugit atuisartuni pisisartunilu ilisimasaqarnerulernissamik sulissuteqarsimasunik, inassuteqaatigineqarsinnaasunik ujarlerluni aallartippoq.
Nersornaaserneqartussaq naliliisartutut ataatsimiititaliamit nunani avannarlerni nunanit tallimanit namminersorfiusunillu Savalimmiunit, Kalaallit Nunaannit Ålandimiillu sinniisuutitaqarfigineqartumit toqqarneqassaaq. Kalaallit Nunaat sinnerlugu Karen Motzfeldt Nunami namminermi pissutsinut, Pinngortitamut Avatangiisinullu Naalakkersuisoqarfimmeersoq naliliisartutut ataatsimiititaliami ilaasortaavoq.
Nunat Avannarliit Siunnersuisoqatigiiffiata 2010-mut Pinngortitamut Avatangiisinullu tunngatillugu nersornaasiutassaa pillugu paasissutissat sukumiinerusut piumasaqaatillu nittartakkami www.norden.org-imi pissarsiarineqarsinnaapput.
