Avatangiisinik ingasattumik illersuiniaq tunuaqquaat
Piniartut qilalukkanik Nunavummi Mitsimatalimmi - Pond Inletimi - sikumi ammalatami sassimmata, qilalukkallu 500-init amerlanerit pisaralugit, Paul Watsonip Inuit tassaanerarpai ”toornaarsiviup naqqatulli taartigisumik uummatillit”, oqarlunilu ”tiaavuluusut soqutigittaatsut”.
Amerikamiut sakkutuui sakkutuujunngitsunik Vietnamimi 1960-ikkunni toqoraanersuat piniartut qilalukkanik toqoraanerannut Paul Watsonip aamma assersuuppaa.
Canadami Aalisarnermut ministerip, Gail Shea-p, aamma Peqqinnissamut ministerip, Leona Aglukkaq-p Paul Watsonip oqaasii ajuallannartorujussuunerarpaat, Sea Shepherdilu kaammattorpaat Paul Watsonip præsidentitut soraarsitaanissaa anguniaqqullugu.
- Mr. Watson inuiaqatigiinnut Inunnut narrunarsaavoq, kulturiat ileqqutoqaallu ajorsaarpai, ministerit canadamiut taakku marluk qalleqqissaapput, isumaqarlutillu Paul Watson ingasattajaarujussuartoq, canadamilu inuiaqatigiinnit tamanna akuersaarneqarsinnaanngilluinnartoq.