Avataasiortunut pisassiissutit sinerissap qanittuani aalisartunut nuunneqassagunartut

Aalisarneq pillugu inatsisissamut allannguutissatut Siumup politikkukkut oqaaseqartartuata Lars-Emil Johansenip siunnersuutaa Inatsisartuni ippassaq oqallisigineqarmat amerlanerussuteqarluartunit tapersersorneqarpoq.

Lars-Emil Johansen ima oqarpoq:

- Raajarniat ukiup naalernerani raajarniarnerat unittoortinneqannginnissaat, minnerunngitsumillu nunami suliffissuit ukiup naalernerani juulleriartulernerani suliffissaarutsinnissaat pinngitsoortinneqassappat piaartumik iliuuseqarnissaq pisariaqarpoq. Nukingernarpoq, Lars-Emil Johansen oqarpoq, nangipporlu:

- Paasissutissat assigiinngitsut atorneqarput. Pisat qanoq amerlatiginersut pillugit paasissutissat uanga paasisakka najoqqutaralugit pisoqaavallaartut naalakkersuisunut apuunneqarsimapput, umiarsuillu ilaat nunamut tulaassuisuunngitsut pisassaat ilanngullugit allaat sinneruttutut nalunaarutigineqarsimallutik, Lars-Emil Johansen oqarpoq.