Avannaata sanaartugassanut 82 millionit koruunit aningaasaliissutigai

Sanaartugassat katillugit 20-t suliarineqarnissaat kommunip siunniuppaa.

Ilulissani ivigaasaaralimmik arsaattarfeqalissaaq, taamatullu nutaamik skolehjemitaassaalluni. Ilulissammi nunaqarfiineersut meerartaasa Aasianni skolehjemmimiittarnerat kommunimi allamiinnera aaqqiiviginiarneqarpoq. Avannaatami Kommuniata Qeqertallip Kommunianut aningaasartuuteqartarnera, taamatullu meeqqat skolehjemertut ilaquttaminnut qaninnerulernissaat anguniarneqarluni.

Skolehjemmissap ukiuni pingasuni sanaartorneqarnissaa naatsorsuutigineqarpoq.

Uummannami nutaamik paaqqinnittarfeqalissasoq kommunalbestyrelsimit aalajangiunneqarpoq. Nuugaatsiarmiut Illorsuarmiullu Uummannamut nuutsinneqarnerisa kingunerannik paaqqiinnittarfimmiittuuteqalertussanut utaqqisut amerlisimaneri nutaamik sanaartortoqarnissaanut aalajangiisuuvoq.

Uummannap nunaqarfiisa ilaanni Ukkusissani illu sulliveqalissaaq paaqqinnittarfittalimmik. Najugaqartut aalisarnerisa nalaanni qitornaat paaqqutarineqarnissaat anguniarneqarluni.

- Ullumikkut ilaqutariit aalajangersimasumik suliffeqarniarnerat ajornakusoorsinnaasarpoq, angajoqqaani arlaat meeqqanik paarsisariaqartarmat, kommuni allappoq.

Upernavimmi utoqqaat illuat aamma allilerneqassaaq.